[b]كلمات الرائع :
الدكتور الشاعر صلاح عبدالله
• أنا نفسي أرجعلك يارب انما
ضعفي أسرني ودنيتي مضلمة
أصل اللي بيعود عنيه ع التراب
بيخاف قوي يرفع عينيه للسما
0000
لله يا أسيادي..
رئيس لله يا أسيادي...
رئيس لله، رئيس عادي...
رئيس شايل في ضي عنيه مدن زحمة وخضار الريف...
ويعرف سكة الخاينين، ويفضل هو برضو شريف...
رئيس يقدر بأنفاسه...
يطفي في مصر كل حريق...
بإيد يضرب، وإيده التانية بتطبطب... إيدهي جامدة وقلبه رقيق...
بصوته يخوف السجان...
وضحكته قبلة للغلبان...
ويحلف مية يمين ع الشمس: بكرة تجيني في معادي...
رئيس لله يا أسيادي...
رئيس مهمى السكك كترت قصاد عينه، لا يمكن ييجي يوم ويتوه...
ولما يشوف على جنب الطرق عواجيز، قوام يتذكر أمه وأبوه...
حروف اسمه تخلي المجرمين يجروا...
وفي المغرب تشوف أطفال على حجره...
ويوم ما الغربة تخطفني...
أو الموت ييجي يقطفني...
أسيب له في حجره أولادي...
رئيس لله يا أسيادي...
رئيس ياخد بإيد الفجر لجل يدخله بلادنا...
ويبدر منه ع العشة إلي شقيانة، وع الفلة، وفوق برج الحمام العالي، والمدنة...
ولما يلفنا في إحساسه، نتدفى، عشان هو ما لوش قلبين...
وكلمته ليها باب واحد، مفيش عنده كلام ببابين...
رئيس لو حس إنه عفي، بيسأل نفسه عن موجوع عيونه محرومين م النوم...
ولما تبص في عيونه ما تتخضش...
كأن عيونه فيها الصلح ما بين توبة الظالم، وما بين دعوة المظلوم...
نسَنِّده لما يوم يتعب...
ونسند إحنا برضو عليه...
يسيب جوانا إحساسه...
ونبقى إحنا إيديه وعنيه...
من الخضرة بيبدأ سكة المصنع، وم المصنع بيبدأ سكة النادي...
رئيس لله يا أسيادي...
رئيس لله يكون أصلي، وما يكونشي يادوب صورة...
لا إيده عمرها اتعاصت في يوم ولا عينه مكسورة...
يفتح في التخين عينه...
ويرفع للسما جبينه...
رئيس يصبح بخور لبلادنا، يطرد لعنة الملعون...
إذا حضنك تقول في ضلوعه قلب نبي. ولو بص لأعادينا تقول فرعون...
تفكرني ابتسامته الحلوة بابن ابني..
وإذا كشر يفكرني بأجدادي...
رئيس لله يا أسيادي...
رئيس لله، إذا وطيت تبوس إيده، يشد إيديه، وياخدك بين دراعاته، يقول لك لأ...
أنا منك، وأنت مني، إوعا تبوس إيدين تاني، وإوعا للهوان تنزق...
يحس بملمس الجلابية فوق الجلد، مهمى لبس بدل فخمة...
وإحساسه إن فيه في بلاده حد جعان، مخليه يعتبر إن الشبع تخمة...
جدع طازة، بطعم الخضرة قبل ما تتقطف م الغيط...
يسايس ناس، ويخدع ناس، ومن قلبه يصارح ناس، وطيب بس برضو حويط...
ويكره كل أغنية كتبها حد م الوسخين على اسمه...
ما عندوش كرسي للحرامية، والناس إلي ع المساكين بيترسموا...
يا مصر دا مش حيى الله رئيس وباحلم بيه، دا هايكون ميتي وزادي...
رئيس لله يا أسيادي..
0000
• لبست جزمة لامعة ومزيقة
ومعاها بدلة واسعة ورقيقة
نقتها واسعة لحد آخر مدي
لكن بايه تفيد والحياة ضيقة
0000
• اسمع يا صاحبي وانت هادي ورايق
اسمع كلام صاحبك ولو كان يضايق
فيه ناس كتير ممكن تتوه م الضلال
وناس كتير ممكن تموت م الحقايق
0000
• ليه كل فرحة أفرحها يقتلها همي
أهل الحكم ما قالوش وجوبتني أمي
الفرحة زي اللقمة زرق وقدر
من قبل ما تبدأها لازم تسمي
0000
• علي كل شبر بتتولد مدبحة
تحكي حكايات الدم والأسلحة
بس العدالة في حتة زي الحصان
وفي حتة تانية عامية ومكسحة
0000
• قالو لتور اتمني واطلب يا تور
قال نفسي في الحرية زي الطيور
كسروا السواقي وسرحوه في الخلا
ساعة ولقوه في مكانها عمال يدور
0000
• علي ايه قبلت تكون لغيرك تبع
ورضيت بعيشة الذل لأجل الطمع
فيه الف نوع من أكل يهوس صحيح
يا هلتري فيه الف نوع م الشبع
0000
استدراج.
خدني عنده وقال بصراحة: عايزك تبقى عميل...
تنقل لي أخبار الخونة، صبح وضهر وليل...
عايزك لما الكل ينام...
تتسلل بين الأحلام...
وتشوف مين ويانا؟ ومين معادينا؟ ومين بيروج للتضليل؟...
قلت له : أول واحد لازم أبلغ عنه واحد ذنبه تقيل...
لسا بيصحى الصبح ويضحك..
وبيزرع مواويل...
ويحط ترابها على دماغه، وبيوشوش للنيل...
وبيتكلم قال عن بكرة!!.. ويقول لك لو جيلنا ما طالشي بكرة هايطلع جيل...
ويقول لك أنا قلبي لسا ممدد بين المصحف والإنجيل..
يركع يتبارك بالطين..
عطره يادوب عرق المساكين..
وأما عنيه تنظر ناحيتكم، قال يتعوذ م الشياطين..
رافع راسه ولسا بيحلم ينلا الدنيا نور وغنا..
قال لي دا مين الكلب الخاين؟..
اتنهدت وقلت أنا!!..
0000
كسرة نفس.
سعادة البيه أنا وياك..
في كل إلي تقوله معاك..
عايزني أعترف؟ حاضر، أنا إلي جلبت عالدنيا دي كل هلاك..
أنا إلي سرقت أي حاجات هاتكتب إنها انسرقت..
وأنا إلي حرقت أي بلاد هاتكتب إنها انحرقت..
وكل قتيل مالوش قاتل، أنا إلي خنقته ولا رميته مالشباك..
تشاور لي على موزة، وتسألني دي تطلع إيه؟ أقول لك فجل..
تشاور لي على راسي، وتسألني، دي تطلع إيه؟ أقول لك رجل..
ولو تسألني عن ديني هاقول بجنون..
لا أنا مسلم ولا مسيحي، أنا مسجون..
لأن السجن دين غير أي دين معروف..
مالوش ولا رب إلا الخوف..
صيامه إنك تعيش أخرس..
صلاته إنك توطي وبس..
سعادة البيه، أنا اتغيرت..
فهمت القصة واتنورت..
ولما أخرج بإذن المولى راح تتغير الصورة..
عشان عارف بإن أنا أكيد هاخرج بجسم سليم وجواه نفس مكسورة..
قصير راسي بتساوي يادوب جزم إلي في السكة، ماليش غير المذلة لبس..
لأن النفس يا باشا إذا انكسرت تعيش مكسورة مالهاش جبس..
وفي الخناقات هاوطي الصوت..
وهاستنى إلي جي وراي بالراحة عشان ما يفوت..
ولما أقعد في وسط صحابي، لو سألوني عن حاجة هاقول ما أعرفش..
كأني طفل جي جديد ولسا ما شافش..
ولو سألوا على البطل إلي كان جواي هاصرخ مات..
ولو قالوا كرامتك فين؟ هاقول يا صحابي فضوها، كرامتي نسيتها في الأمانات..
وأداري وشي من نينتي..
وأخاف أنظر في عين بنتي..
ولما تقول لي بنتي أنت مش بابا، هقول لها هُس بابا بتاع زمان انسيه..
دا أصعب حاجة في الدنيا إن جرحك يبقى عايش برا جسمك، لا أنت بتعالجه، ولا طايل تمد إيديك وتهرش فيه..
سعادة البيه أمانة تبلغ المأمور..
بإني خلاص بقيت قمور..
في وشي ضحك سعادة البيه، ومد إيديه وطبطب لي على ضهري..
وقال لي: برافو، أنت كدا بقيت مصري..
0000
انا عشت عمري بحاله أسرع حصان
وخطوتي يا دنيا كانت ميدان
العمر عدي ومن حلاوة السبق
ما لحقتش اسأل هو ايه الرهان
0000
سهرت ليلة بحالها ويا النجوم
احسب علي نفسي النجاح والهموم
وفضلت أحلم بكرة ايه حاعملوا
لكن نعست الصبح ما قدرت أقوم
0000
واحد فقير أوجاعه ما بتنتهيش
ما فيش في عيشته الا كلمة مافيش
بيبيع دواه علشان يجيب لقمته
ويا إما يتعالج ياإما يعيش
0000
أنا نفسي أرجعلك يارب انما
ضعفي أسسِرني ودنيتي مضلمة
أصل اللي بيعود عنيه ع التراب
بيخاف قوي يرفع عينيه للسما
0000
سيد سبرتو.
هي إيه الحرب إلا فاجرة وبتعرف تتاجر في المحال؟..
فاجرة بتزغرط وهي ماشية تتقصع على رقاب الرجال..
فاجرة حاطة أحمر وله أسماء كتيرة بتمزج الفرح بألم..
لما يبقى في وشها يبقى اسمه روج، وأما يجري في جسمنا يبقى اسمه دم..
والحروب في الدنيا مش من مصلحتها يبقى فيه في الدنيا شيء اسمه النجاة..
الحروب مالهاش قرايب لجل ما تحوش لهم حبة حياة..
وأما تلقى الحرب تعرق موت وتنفض عنها توب من بعد توب..
يبقى فيه ناس منصورين، يبقى فيه ناس مهزومين، بس في ناس تانية خالص هما دول تفل الحروب..
ناس ولا بيتقال لها مبروك، ولا بيتقال لها انسي إلي عدى وشدي حيلك..
ناس بتسأل مين يا دنيا من حياتنا الباهتة خد صبحك وليلك؟..
وسط دول واحد تملي ناسي نفسه، وكان بيطلب مننا نحكي له سيرته..
اسم أبوه تاه منه في الخمرة الرخيصة، وابتدينا نقول عليه سيد سبرتو..
هو كان واقف في وسط الحرب بين جبنه وبطولته..
لما جات له طلقة طايشة فجأة بين رجله ورجولته..
طلقة جات له في جناحات الضحكة وفي بكرة إلي جي..
من يوميها الناس بتحلف له بإنه لسا حي..
ياما شفته لما يتمرغ على الرملة، وينده ليلة من عمره الجريح..
صوته كان يشبه لصوت السنفرة ساعة ما بتحك الصفيح..
كان يكشر لما يلقى الشمس جية وهو رايح..
زي ما تكون السما في الصبح بتمطر فضايح..
وأما بيحاول يفوق يلقى الحياة بتقص ريشه..
يركب الكباية للعصر إلي كان نفسه يعيشه..
بعد ما يسكر يغني، يقول يا كاس فسحني فسح..
سيد المسكين كان أعرج والزمن حواليه مكسح..
وأما يسند عالحيطان يلقاها أكتر منه سكرانة، يمدد جنبها..
يبتدي يسأل دا ذنبه هو ولا ذنبها؟..
وأنت سهل إنك تشوف الدنيا بتحاول تحايله..
لما تلقاه جي يتخانق وجايب حد شايله!!..
يلا يا ولاد إلي كانت، وإلي كانتوإلي كانت..
وإلي شايله يقول يا سيد اهدا حبة، كتافي لانت..
سيبني أربيهم، يا عم الطيب أحسن، دول غلابة...
وإلي جي لجل يخانقهم موتوا الشر إلي في عنيهم، وسكنتها الطيابة.. جي أوريكم مقامكو الواطي وحياة الحسين..
يضحكوا له، ويقولوا له، انزل يا سيد خد كاسين..
يبتسم سيد سبرتوا وتلاقيه بطل كلام..
يضحكوا بالراحة ويقولوا إنه نام..
وإلي شايله فوق كتافه يقول ياهوه..
اعملوا معروف يا عالم روحوه..
وأما بينام كان بيملا عنيه بأحلامه الشُرُك..
وأما يصحى تحس إنه بيسحب الأيام شكك..
رحت مرة أسأل صحابه عنه قالوا الكاس شفاه..
من مرض اسمه الحياة..
0000
خليت يا قلبي الغربة ليه تدبحك
وما عدش شيء في الدنيا بيفرحك
الغربة مش انك تسافر بعيد
الغربة انك تتنسي في مطرحك
0000
خالتي أم عبده.
وكنت زمان أنا وصاحبي بنلعب كورة جوا الحوش..
يشوطها لي، أشوطها له، ولما الكورة تجري لجل تطلع برا نجري وراها لجل نحوش..
وكانت كورة غلبانة خرق مفوفة جوا شراب..
ما بتنطش، وماليهاش صوت، وكنا فرحانين بيها، لأن الفقر بيفرح صحابه بأي حاجة، إن كان صحيح الفقر له أصحاب..
تقعد خالتي أم عبده هناك على العتبة في ليالي الصيف..
لا عندها حد تخرج له ولا ييجي لها في اوضتها ضيف..
كبيرة وشعرها شايب، وأيامها كمان شايبة..
تشوف صوابعها تحسبهم، يادوب مناديل ورق دايبة..
وكانت طيبة، يا تكلمك في الدين..
يا تحكي قصص عن العمر إلي فات والعز والفدادين..
وكنا عيال وكل الدنيا بالنسبة لنا لعب ونط..
نفوت من تحت أيامنا ومن فوقها، ولا نعرفش نرسم بين دموعنا وبين فرحنا خط..
تفوت الكورة من جنب أم عبده، تخضها، تشخط قوام فينا..
وتشكينا لأهالينا..
وبعدين يا ابني منك ليه؟..
بتلعبوا كورة جنبنا ليه؟..
وديني لو أمسك الكورة ما أرجعها..
وديني أقوم أجيب سكينة قدامكم وأقطعها..
تقول ما تقول ولا نسمع كلام منها..
وأقول للواد تعالى عشان نجننها..
يقف صاحبي أشوط له الكورة، تيجي الكورة في القُلة وفي الكتكوت..
وتيجي في أم عبده، وأما تاخد مننا الكورة بندعي نقول يا رب تموت..
وكنا بنفتكر دنيتنا عن طفولتنا مش ممكن تزحزحنا..
وإن إحنا هانفضل زي ما إحنا وتفضل الكورة تفرحنا..
وماتت من زمان خالتي أم عبده وضاعت الكورة..
ولعبت بينا دنيتنا، وخلت نفس عالية ونفس مكسورة..
كبرت أنا وكبر صاحبي، ودنيتنا خدتنا بعيد..
وراحت مننا الضحكة، وأيامنا اتملت تجاعيد..
لا أنا عرفت أبقى زي ما أنا، ولا صاحبي فضل هو..
وعجز صاحبي من برا، وأنا عجزت من برا ومن جوا..
وراح بيتنا القديم واتهد..
وبيت تاني في مكانه للسما السابعة علي واتمد..
وأيامنا الكتيرة بعترتنا بين سواد وبياض..
وكل حاجات عشقناها زمان راحت مع الأنقاض..
ودلوقتي، ساعة ما عيالنا ييجوا يلعبوا في المدخل الكورة بسرعة بالاقي صدري يضيق..
أقوم أفتح لهم بابي وهات يا زعيق..
وبعدين يا ابني منك ليه..
بتلعبوا كورة جنبنا ليه..
وديني لو أمسك الكورة ما أرجعها..
وديني أقوم أجيب سكينة قدامكم وأقطعها..
كفاية وخلوا يومكم يفوت..
بقيت أنا للأسف خالتي أم عبده، بس باضحك كل ما أسأل نفسي، فيه كام طفل في الشارع بيدعوا علي إني أموت؟..
0000
وردة ما تظهرلكش الا في منام
اتعززت علي كل فََسل وهُمام
واما القدر جابها ليوم قطفها
وقعت في ايد واحد مصاب بالزكام
0000
وقف في وش مرايته لأجل المعاينة
وبص شاف تجاعيد علي وشه باينة
رفض وقام كسَّر مرايته وقال
حتي المراية اتعلمت تبقي خاينة
0000
مراية نادية.
مراية نادية لما تكون قصاد عينها..
بتتهرب قوام منها..
عشان ملامحها دايما تسأل المرايات سؤال غامق ومالهوش رد..
أنا مقبولة في عيون الخلايق ولا وحشة بجد؟..
ونادية بعد ما بتسألها بتصهين وتتاوب..
عشان مرعوبة لا المرايات في يوم تعملها وتجاوب..
وصرخة نادية غصب عنها ملفوفة في توب الهمس..
وأيام نادية ما ليهاش حاجة بتميزها إلا الشمس..
وأحلام نادية دايما تحت رجلين الحقيقة إلي ما تبنيش بيت..
تحس إن البنات حواليها فعلا خلصوا الأحلام، ومش فاضل غير الفتافيت..
تدوب نادية ما بين بكرة إلي متأخر وبين الآه..
تسلم أمرها لله..
وفجأة تلاقي رديو جيرانهم الكداب..
يقول يامة القمر عالباب..
تسيب كل إلي في إيديها، وتفتح بابها بالراحة..
وتبقى عنيها سواحة..
ما تلقاش القمر عالباب..
تلاقي الريح مكوم جنب بابها تراب..
وترفض إنها تجيب للبنات سيرة..
وترجع تاني للحيرة..
ما بين مرايات ما بتقولش إلا كلمة حق..
وبين شبان بعاد جدا عيونهم حتى عنها مكسلة تقول لأ..
وترجع تاني للشباك، عشان نظرات عنيها تصدم الماشيين..
تقول يا هل ترى القسمة هاتيجي بمين؟..
يكونش العايق الباصص من الشباك؟..
يكونش الراجل إلي موطي راسه هناك؟..
يكونش؟ يكونش؟..
يا أحلام كل بنوتة إلي ساكنة في كل حتى إلا جوا في بيتنا ما بتسكنش..
وتضحك نادية، تلقى الضحكة تنزل من عنيها دموع..
تشيل نادية العشا البارد وهي بتتحرق مالجوع..
وتتغطى، ومهمى كان غطاها تقيل، بتفضل برضو بردانة، تقول يا وهم دفيني..
لأن مفيش غطا في الدنيا دي بيقول وحشتيني..
وتسند راسها عالحيطة، وتقفل عينها لجل تشوف ولاد أجمل من الأعياد..
وبس يا بت، بس يا واد..
يصح أبوكو يتأخر وجنب الأكل يلطعني؟..
إليه ما يوعى، بعد الشر يقطعني..
إلهي ما اتحرم في الدنيا حتى من خناقي معاه..
إلهي ما نتحرم في الدنيا من إن إحنا نستناه..
وتفتح عينها عالقطة إلي بتشد الطبق تكفيه..
تكسل حتى تطردها، في داهية الصحن وإلي فيه..
وتتغمز بنات الحي..
ساعة ما يشوفوا في ابتسامتها لمحة ضي..
أكيد نادية في حياتها سر..
وتضحك نادية من جوا عل السر إلي لا يشرف ولا بيعر..
وتضحك نادية من جوا، عشان عارفة إن أكبر سر بيهدد حياتها إن ما فيهاش سر..
0000
يا مالي بالأحلام عينيك آه وآه
مش كل حلم أحبه واجري وراه
فيه حلم بيهون عليك دنيتك
وحلم تاني يكرهك في الحياة
0000
مرشح توافقى .. أم مرشح تلافقى؟!! .. " توافقى من التوافق .. وتلافقى من التلفيق " ..
أرى أن كلمة الرئيس التلافقى التوافقى إهانة للمصريين جميعاً ..
ومصادرة لحقهم وإرادتهم فى إختيار من يرأسهم ... شارك برأيك .
0000
معاد.
ووقفت أستناكِ في وسط الزحام..
وأنا جاي كانت كل حاجة في بتمد الخطى، حتى ملامحي بقت كلام..
اخضرت الأرض إلي أنا واقف عليها، اتزينت، وكأنها بطلة رواية..
حسيت بإن الأرض نسيت كل ناس عايشين عليها لأنها مشتاقة لمعادك معاي..
0000
كمولة.
وصبغتِ الشعر يا كمولة!!!..
ياختي عليه، لأ مش معقولة!!..
حطي يا قطة في شعرك جاز!!..
حطي فينكة على العكاز!!..
أول مرة أشوف استاذ..
بيحاول يرجع سنة أولى!!..
وتعيشي لمصر يا كمولة..
غيظي يا قطة المصريين..
ادهني شعرك بالفزلين!!..
إيه يعني تمانية وسبعين..
دا أنتِ يادوب خلصتِ طفولة!!..
وتعيشي لمصر يا كمولة..
هكعتِ ومش حمل الشخطة..
وبتصبغي؟ إنجغا يا سخطة!!..
لجلك مصر هاتعمل إئح..
ونشطفها عشان مبلولة!!..
بشرى لأرباب المعاشات..
الأحياء ويا الأموات..
كفن الميت بمبا مسخسخ..
والعايش سريلاك وكافولة..
ودا كله بحكمة كمولة...
0000
باعشقها بجنونها ودلعها المرء
واروي بنيلها قلبي حتي ان شِرق
وعَرفها راح تستني مهما أغيب
ما هو حضن أم لا يفضي ولا يتسرق
0000
الدنيا بالمتوحشين واللذاذ
موزونة ممنوعة من الإهتزاز
تلقي الإزاز بيحلي شكل الحديد
زي الحديد ما بيحمي ضعف الإزاز[/b]
السبت يناير 05, 2013 5:49 am