محمد زكريا حبيشى ومصر بتنسرق

بسم الله الرحمن الرحيم
السلام عليكم ورحمة الله وبركاتة
مصر بتنسرق
محمد زكريا حبيشى


سرحانه ليه يالله انطقى
محتاجه ليّا افوٌقِك
مين اللى عايزك تخدعي
حلم الغلابه ويسرقك

ليه جتتك ليه قايده نار
وكتير و عايز ينهشك
شايفه العجب طول النهار
والحيره ليه بتكلبشك

اغماء ف شريان الحياه
دايما ملازم سكتك
وبقُبله من قُبَل الحياه
ترجع معالم خطوتك

نبض الضمير فينا اختفى
والدم غاب عن مطرحه
تاه النفاق وسط الوفا
بقت الفلوس بتمطوحه

رعشة قلم زادت ألم
وسط السطور جوه الكتاب
رسموا بايديهم لون علم
كان لونه اغمق م التراب

متفبركه ضحكة فقير
لو شفتها مره ف عنيه
والعقل من قلبى يطير
من كتر خوفى كتير عليه

محروسه من سم الذئاب
مهما الكتير حاول يعِيب
وهتنسى يوم كل اكتئاب
والحق مش لازم يغيب

قومى انفضى جسمك بقى
حِلى المشاكل واعرفى
فيه ناس كتير مستكتره
حلمك ف يوم لو كان عفي